Sunday, September 30, 2007

“ਧੀ ਵਲੋਂ ਬਾਬੁਲ ਦੇ ਨਾਂ”

“ਧੀ ਵਲੋਂ ਬਾਬੁਲ ਦੇ ਨਾਂ”

ਵੇ ਤੂੰ ਕਿਹਨਾਂ ਦੇਸਾਂ ਦਾ
ਵਾਸੀ ਵੇ ਬਾਬੁਲਾ ।
ਤੇਰੇ ਦਰਸ ਬਿਨਾਂ
ਰੂਹ ਉਦਾਸੀ ਵੇ ਬਾਬੁਲਾ ॥

ਜਿਨਾਂ ਰਾਹਾਂ ਦੇ ਨਸੀਬੀ
ਅਸੀਸ ਨਾਂ ਤੈਂਡੀ ।
ਉਨ੍ਹਾ ਰਾਹਾਂ ਤੇ ਜਿੰਦ
ਰੁਲ ਜਾਸੀ ਵੇ ਬਾਬੁਲਾ ॥

ਸਾਡੇ ਗੁੱਡੀਆਂ-ਪਟੋਲਿਆਂ ਦੀ
ਕਦਰ ਨਾਂ ਹੋਈ ।
ਹੋਏ ਬੋਲ ਕੁਬੋਲ
ਲੱਖ-ਚੁਰਾਸੀ ਵੇ ਬਾਬੁਲਾ ॥

‘ਕਵ਼ਲ ਨੈਣਾਂ’ ਦੇ ਸਾਗਰਾ ‘ਚੋਂ
ਬੂੰਦ ਨਾਂ ਛਲਕੀ ।
ਅਸਾਂ ਹੰਝੂਆਂ ‘ਚ ਉਮਰ
ਲੰਘਾਸੀ ਵੇ ਬਾਬੁਲਾ ॥

ਮੈਂਡੀ ਬਾਲ ਉਮਰ ‘ਚ
ਤੈਂਡਾ ਪੰਧ ਮੁੱਕ ਗਿਆ ।
ਕਿੰਝ ਹੋਵੇਗੀ
ਬੰਦ-ਖੁਲਾਸੀ ਵੇ ਬਾਬੁਲਾ ॥

ਕਿਸੇ ਚਾਂਦੀ ਦੀਆਂ ਰੱਸੀਆਂ ਦਾ
ਜਾਲ ਵਿਛਾਇਆ।
ਮੈਂ ਤੱਤੜੀ ਦੀ ਜਿੰਦ
ਹੋਰ ਫਾਸੀ ਵੇ ਬਾਬੁਲਾ ॥




ਇੱਕ ਪੀੜ ਡਂਘੇਰੀ
ਦੂਜਾ ਆਸਰਾ ਨਾਂ ਕੋਈ ।
ਗੂੰਜੇ ਸੁੰਨ ਮੇਰੇ
ਚਹੁ ਪਾਸੀ ਵੇ ਬਾਬੁਲਾ ॥

ਇਸ ਸੁੰਨ-ਮਸੁੰਨ ਵਿੱਚ
ਬੋਲ ਅਗੰਮੀ ।
ਕਦੇ-ਕਦੇ ਆਸਰਾ
ਦੇ ਜਾਸੀ ਵੇ ਬਾਬੁਲਾ ॥

ਮੇਰੀ ਸੁਰਤ ‘ਚ ਚਮਕਣ
ਨਕਸ਼ ਤੁਸਾਂ ਦੇ ।
ਪਏ ਖੁੱਲਦੇ ਨੇ ਭੇਦ
ਅਕਾਸੀ ਵੇ ਬਾਬੁਲਾ ॥

‘ਕਵ਼ਲ ਨੈਣਾਂ’ ਦੇ ਸਾਗਰਾ ‘ਚੋਂ
ਬੂੰਦ ਜੋ ਛਲਕੀ ।
ਮੈਂ ਭਈ ਸਾਹਿਬ ਦੀ
ਦਾਸੀ ਵੇ ਬਾਬੁਲਾ ॥

ਬਲਬੀਰ ਸਿੰਘ ਅਟਵਾਲ

2 comments:

Akashdeep luther said...
This comment has been removed by the author.
Akashdeep luther said...

Really appreciate you veere...head down to you